काठमाडौं, १९ मङ्सिर ०८२ । साविक विजेता जनकपुर बोल्ट्सविरुद्ध चार विकेटको जित निकाल्दै लुम्बिनी लायन्स नेपाल प्रिमियर लिग (एनपीएल) दोस्रो संस्करणको प्लेअफमा पुग्ने चौथो टिम बनेको छ ।
लुम्बिनीको यो जितसँगै प्रतियोगिताको प्लेअफ पुग्ने चार टिमको टुंगो लागेको थियो । प्रतियोगिताको लिग चरणबाट यसअघि नै सुदूरपश्चिम रोयल्स, काठमाण्डू गोर्खाज र विराटनगर किंग्सले प्लेअफमा स्थान सुनिश्चित गरेका थिए । हारसँगै जनकपुर बोल्ट्स, पोखरा एभेन्जर्स, कर्णाली याक्स र चितवन राइनोजको चुनौती भने लिग चरणबाटै समाप्त भएको छ ।
शुक्रबार कीर्तिपुरस्थित त्रिवि क्रिकेट रंगशालामा सम्पन्न खेलमा जनकपुरले प्रस्तुत गरेको १३३ रनको मध्यम लक्ष्य लुम्बिनीले १९।१ ओभरमा ६ विकेट गुमाएर पूरा गर्यो ।
लुम्बिनीको जितमा रोहितकुमार पौडेलले सर्वाधिक ३४ रन बनाए । उनले ३२ बमा दुई चौका र एक छक्का प्रहार गरे । डी‘एर्सी शर्टले २४ बलमा एक चौका र दुई छक्कासहित ३० रन जोडे । यी दुईले ०–१ को स्थितीबाट ६१ रनको साझेदारी गर्दै लुम्बिनीको शीर्ष क्रम सम्हालेका थिए ।
जेजे स्मिथले २१ रन थपे । निरोसान डिकवेलाले १७ रन बनाए । सुमित महर्जन र सन्दीप जोरा ‘गोल्डेन डक’ भए । दीलिप नाथ १५ रनमा अविजित रहे ।
जनकपुरका संगिथ कुरे र मयन यादवले दुई–दुई विकेट लिए । सञ्जय कृष्ण्मुर्थीले एक विकेट लिए । जनकपुरले लुम्बिनीविरुद्ध सात स्पिनर प्रयोग गरेको थियो ।
त्यसअघि टस जितेर ब्याटिङमा आएको जनकपुरले निर्धारित २० ओभरमा ६ विकेट गुमाएर १३२ रनमात्र बनाएको थियो ।
जनकपुरका संगिथ कुरेले सर्वाधिक ४५ रन बनाए । उनले ३८ बलमा दुई चौका र एक छक्का प्रहार गरे । ८३–६ को स्थितीबाट कुरेले मयन यादवसँग सातौँ विकेटका निम्ति ४९ रनको साझेदारी गरे ।
मयनले २३ बलमा एक चौका र एक छक्कासहित २७ रन थपे ।
अर्का ओपनर आसिफ सेख पनि २० रनमा पभेलियन फर्किए । सञ्जय कृष्णमुर्थीले ११ बलमा एक छक्कासहित १४ रन जोडे । जनकपुरले माज सदाकतलाई ६ र अनिल साहलाई सात रनमा गुमाएको थियो ।
लुम्बिनीविरुद्ध कप्तानी जिम्मेवारीमा रहेका जान निकोल लोफ्टी इटोन गोल्डेन डक भए ।
लुम्बिनीका शेर मल्ल र कप्तान रोहितकुमार पौडेलले समान दुई विकेट लिए । जेजे स्मिथ र रुबेन ट्रम्पलमेनको नाममा समान एक विकेट रह्यो ।
