काठमाडौँ, १८ मङ्सिर ०८२। आफ्नो अपराजित यात्रा कायम राख्दै चितवन राइनोजविरुद्ध ४९ रनको जित निकालेपछि सुदूरपश्चिम रोयल्सले नेपाल प्रिमियर लिग (एनपीएल)को लिग चरणमा शीर्ष स्थान सुनिश्चित गरेको छ ।
बिहीबार कीर्तिपुरस्थित त्रिवि क्रिकेट रंगशालामा सम्पन्न खेलमा सुदूरपश्चिमले दिएको १७० रनको लक्ष्य पछ्याउने क्रममा चितवनले १७.१ ओभरमा सबै विकेट गुमाएर १२० रनमात्र बनाउन सक्यो । यो नतिजासँगै सुदूरपश्चिमले लिग चरणमा शीर्ष स्थान सुनिश्चित गरेको । हालसम्म अपराजित सुदूरपश्चिमले ६ खेलबाट १२ अंक जोड्दै प्लेअफमा पहिलो क्वालिफायर खेल्ने भएको हो । यो जितसँगै विराटनगरले पनि प्रतियोगिताको प्लेअफमा स्थान बनाएको छ । विराटनगरले ६ खेलबाट आठ अंक जोड्दै प्लेअफ यात्रा तय गरेको हो । योसँगै हालसम्म प्रतियोगिताको तीन प्लेअफ स्थानमा सुदूरपश्चिम रोयल्स, काठमाण्डू गोर्खाज र विराटनगर किंग्सले स्थान बनाएका छन् । अब एक स्थानका निम्ति लुम्बिनी लायन्स, पोखरा एभेन्जर्स, चितवन राइनोज र जनकपुर बोल्ट्स भिड्न्तमा हुनेछन् । कर्णाली याक्स भने प्रतियोगिताबाट बाहिरिसकेको छ ।
चितवनका कुनै पनि ब्याटर सुदूरपश्चिमविरुद्ध खुलेर खेल्न सकेनन् । रवि बोपाराले सर्वाधिक २९ रन बनाए । यस्तै, देव खनालले २८, कप्तान कुशल मल्लले १५ र अर्जुन साउदले १६ रन थपे । बाँकी ब्याटर दोहोरो अंकसम्म पुग्न सकेनन् । चितवनका जर्ज स्क्रिमस गोल्डेन डक भए ।
चितवनलाई सस्तैमा रोक्न सुदूरपश्चिमका पुनित महराले तीन विकेट लिए । पुनितले २।१ ओभरमा १४ रनमात्र खर्चिए । दीपेन्द्रसिंह ऐरी, हिक्मत महरा, अभिनाश बोहरा र इशान पाण्डेले समान एक विकेट लिए ।
त्यसअघि टस हारेर ब्याटिङमा आएको सुदूरपश्चिमले निर्धारित २० ओभरमा चार विकेट गुमाएर १६९ रनको योगफल खडा गरेको थियो ।
सुदूरपश्चिमका लिनले सर्वाधिक ७५ रन बनाए । उनले ५६ बलमा पाँच चौका र तीन छक्का प्रहार गरे । लिन १७औँ ओभरको समाप्तिसँगै ‘रिटायर्ड हर्ट’ भएका थिए ।
लिनले ९२–४ को स्थितीबाट आरिफ सेखसँग पाँचौँ विकेटका निम्ति ४५ रनको साझेदारी गरेका थिए ।
आरिफले १६ बलमा दुई चौका र एक छक्कासहित अविजित २६ रन थपे । ओपनर विनोद भण्डारीले १७ बल खेल्दा दुई चौका र एक छक्कासहित २१ रन बनाए । पुनित मेहराले १३ रन जोडे । दीपेन्द्रसिंह ऐरी १४ बलमा दुई चौकासहित २४ रनमा अविजित रहे ।
चितवनका सैफ जैबले दुई विकेट लिए । जर्ज स्क्रिमस र रञ्जित कुमारको नाममा एक–एक विकेट रह्यो ।
यसअघि आजै भएको पहिलो खेलमा काठमाण्डू गोर्खाजले पोखरा एभेन्जर्सविरुद्ध १३ रनको जित निकालेको थियो ।
